LOOK: Naragsak a pinasangbay ni Mayor Josh Edward Cobangbang ti delegasyon ti LGU New Corella, Davao del Norte a bimmisita ti Cabugao.
Indauloan ni Mayor Jorjan B. Federiso ti 32 nga opisyales ken empleyado ti LGU New Corella a nangiyuswat ti Benchmarking Activity ditoy ili ti Cabugao.
Inpakaammo ni Mayor Federiso a ti ili da ket maysa a 2nd Class Municipality nga agtarigagay nga agbalin a 1st Class Municipality. Kinunana a kayat da a personal a maammoan dagiti best practices ti ili ti Cabugao panggep iti pannakaipatungpal ti proyekto, fiscal and administrative management ken ti pannakaimaton kadagiti programa ti LGU. Maysa pay kadagiti kayat da a maammoan ket dagiti ar-aramiden ti LGU iti pannakaitandudo ti cultural heritage.
Naan-anay a naiparang kadakuada dagiti proyekto ti ili ti Cabugao panggep ti agricultral, social services, health ken peace and order. Naiparang pay kadakuada dagiti aktibidad ti Cabugao ti naglabas a Samiweng Festival ken dagiti plano ti Cabugao para iti masangoanan a tawtawen.
Nagyaman ni Mayor Jorjan Federiso ti nabara a panangsarabo kadakuada ni Mayor Josh Edward Cobangbang ken kunana nga adu ti ehemplo nga inpakita ti Cabugao para iti pannakaipatungpal ti programa ken proyekto ti ilida.
Inpakaammo ni Mayor Cobangbang a dakkel a dayaw para ti Cabugao ti makaiparang ti sabali a pagilian kadagiti best practices ti ili ken mangnamnama isuna nga adu met ti maadal a best practices kadagiti il-ili ti nagduduma a probinsya a bumisbisita ditoy Cabugao.
21 June 2024
Cabugao