LOOK: Naaramid ti Groundbreaking Ceremony para iti mabangon nga Animal Bite Treatment Center ti ili ti Cabugao.
Inmatangan da Atty. Jannah Singson a nangibagi kenni Governor Jerry Singson, ken ni Provincial DOH Office Team Leader Engineer John Foz a nangibagi met kenni DOH Center for Health Development Regional Director Dr. Paula Paz Sydiongco ti naaramid a groundbreaking ceremony. Binayabay ida dagiti opisyales ti ili ti Cabugao nga idadauloan ni Mayor Josh Edward Cobangbang ken ti Sangguniang Bayan ng Cabugao nga idadauloan met ni Vice Mayor Edgardo Cobangbang Jr.
Nakipaset met ti seremonya ni Mr. Dave Zaragoza, ti DOH Representative ti ili, PNP Cabugao, dagiti Department Heads ken Sections Chiefs ti LGU ken dagiti empleyado ti Rural Health Unit nga idadauloan ni MHO Dr. Vanessa Sablay.
Iti panagsarita ni ABC President Mariedes Soller, Chairperson ti Committee on Health ti Sangguniang Bayan, kinunana nga ti Animal Bite Center ti maysa kadagiti kiddaw ti Local Health Board nga idadauloan ni Mayor Josh Edward Cobangbang iti Department of Health sipud pay tawen 2019 ket naan-anay met a napondoan daytoyen ti sidong ti General Appropriations Act 2023 ti DOH.
Inpakaammo met ni MHO Dr. Vanessa Sablay a dakkel a tulong ti pasdek para ti ili kangrunaan na iti pannakaipaay ti anti-rabies vaccine para kadagiti makagat ti aso ken dadduma pay a dingwen. Iti kaaddan ti asideg nga Animal Bite Center ket umasideg met ti pagpaagasan dagiti pasyente nga agkasapulan iti serbisyo.
Kasta met nga inpakaammo ni PDOHO Team Leader Engr. Foz a napateg ti kaadda dagiti vaccine a maipaay kangrunaan kadagiti makagat ti aso, gapu ta ti rabies ket mabalin nga ipatay no saan a masigud a maagasan ti maysa a pasyente.
Kabayatanna, kinuna ni Atty. Jannah Singson a ti pannakabangon ti Animal Bite Center ti mangipaay ti kanayonan a serbisyo ti salun-at para kadagiti kaprobinsyaanna ti Ilocos Sur.
Naan-anay a nagyaman ni Mayor Josh iti idadanon ti gundaway a marugianen a mabangon iti Animal Bite Treatment Center a makaserbi kadagiti kakailianna ti Cabugao ken kadagiti kabangibang nga il-ili ti amianan a paset ti probinsya.
Manamnama a malpas ti pannakabangon ti pasdek ti Animal Bite Center kalpasan ti 150 nga aldaw.
22 July 2024
#Cabugao