LOOK: Naiparang ken naan-anay a napasingkedan iti Integrated Watershed Management Plan (IWMP) ti Cabugao River Watershed.
Inpalawag daytoy ti Department of Environment and Natural Resources-CENR Office kada Mayor Josh Edward Cobangbang, Vice Mayor Edgardo Cobangbang Jr, SBM Gabriel Sunio, agserserbi kas Committee Chair ti Ecology and Environmental Protection, ABC President Mariedes Soller, PPSK President Jeffrey Vicente, ken dagiti nagduduma a miyembro ti Integrated Watershed Management Plan Technical Working Group ti LGU, ken iti Watershed Management Council.
Ti presentation ket inmatangan ti nagduduma nga ahensya kas iti DENR, NEDA, DA, DPWH, DAR, NCIP, DOST ken PNP. Kasta met nga inmatangan daytoy da Ilocos Sur PENR Officer Rosemarie Jornacion, Northern Ilocos Sur CENR Officer Engr. Antonio Ridulme, dagiti representatives a naggapu iti PGIS ken ti LGU Sinait, ken dagiti nagduduma nga NGOs.
Inlawlawag ni Forester Jeusom Jerie Manuel, Environmental Management Specialist ti DENR Northern Ilocos Sur ti linaon iti Integrated Watershed Management Plan para iti naan-anay a panangpasingked iti Watershed Management Council.
Basar iti presentation, naiparang a ti Cabugao ket maysa kadagiti priority critical watershed ti Region 1 nga addan ti kalawa a 7,741.54 hectares ket masakopanna iti ili ti Cabugao ken Sinait. Ti watershed ket addan iti 4,119.14 hectares a daga a maituding kas alienable ken disposable, 3,575.25 hectares ditoy ti maituding kas forestlands, ken 47.15 hectares met iti maituding kas protected area.
Gagem ti IWMP a makapaadda iti sustainable ecotourism activity ken facilities, ken mapaadda dagiti kalsada, rangtay ken eco-friendly equipments tapno makasuporta haan laeng kadagiti mannalon, ngem amin kadagiti umili. Maaramid pay iti rehabilitasyon dagiti dams, SWIS, irrigation canal ken flood control, ken pannakamonitor iti water quality iti watershed. Kasta met iti pannakaitandudo ti Environmental and Natural Resource Laws ken pannakaaramid ti tree planting activities. Kagiddan daytoy ti plano ti pannakaitandudo ti sustainable public-private partnerships, pannakapreserba ti cultural heritage, traditions ken spiritual values, ken pannakairaman iti tulong iti Indigenous Cultural Communities and Indigenous Peoples.
Nagyaman ni Mayor Josh Edward Cobangbang iti naan-anay a pannakaileppas iti Integrated Watershed Management Plan a maysa kadagiti kasapulan unay a plano nga ipatungpal ti ili ti Cabugao. Kinunana a babaen iti daytoy a plano ket naan-anay a maipakat iti pannakaipatungpal na.
Immun-unan a naiparang iti Integrated Watershed Management Plan iti Regional IWMP Review Committee (RIC) ken Watershed Multi-Sectoral Technical Evaluation Committee idi October 1 sadiay San Fernando City, La Union.
15 October 2024
#Cabugao